|
|
Muzey
|
|
|
Qədim Bakının
köhnə məhəllələrinin birində sadə,
birmərtəbəli bir ev var. Bu evdən həmişə
musiqi sədaları gəlir, bu evin həmişə qonağı
olur; artıq bu məhəllənin sakinləri və yolu
bu küçədən düşənlər buna öyrəşiblər.
İndi bütün Azərbaycan xalqının beyninə
həkk olan və dilinin əzbəri olan həzin melodiyalar
əsrimizin əvvəllərində bu evdə yaranmış,
yaradıcı süzgəcindən keçərək pəncərələrdən
ətrafa yayılmış, könülləri oxşamışdır.
Bu ev dahi Azərbaycan bəstəkarı, milli peşəkar
musiqimizin banisi, dünya şöhrətli Üzeyir bəy
Hacıbəyova məxsus olmuşdur. Bu gün isə bu
məkan sevimli bəstəkarın Xatirə Ev-muzeyi kimi
bir ziyarətgaha çevrilmişdir.
25 ildən artıqdır
ki, bu musiqi məbədı minlərlə insana mənəvi
qida, yüksək bədii zövq, xoş əhval-ruhiyyə
bəxş edir. Müxtəlif ölkələrdən,
şəhərlərdən bu müqəddəs ocağa
qonaq gələn müsafirlər elə ilk andaca bəstəkarın
sehrkar musiqisinin tə'siri altına düşürlər.
Burada nümayiş etdirilən hər bir əşyanın,
maket və foto-şəklin, sənədin, məktubun,
hədiyyənin öz tarixi var ki, bu da dahi bəstəkarın
ömür yolu ilə, yaradıcılığı, həyatı
ilə, bir sözlə şəxsiyyəti ilə tanış
olmaq imkanını yaradır.
|
|
|
Hacıbəyovun ev-muzeyi bəstəkarın 90 illik yubileyi günlərində, 1975-ci
il, noyabrın 20-də açılmışdır. Dahi bəstəkarın ruhunu yaşadan ilk ev-muzeyi
onun Şuşada, uşaqlıq və gənclik illərinin keçdiyi evdə hələ 1959-cu ildə
açılmışdı. Bu iş Üzeyir bəyin vəfatından 3 ay sonra, 1949-cu il, fevralın
16-da Azərbaycan hökumətinin qərarına əsasən
|
|
|
yerinə yetirilmişdi. Bakıda
isə yalnız 26 il keçdikdən sonra, o zaman Azərbaycan KP MK-nın I katibi
işləyən Heydər Əliyevin yaxından köməyi və səyi nəticəsində Şamil Əzizbəyov
küçəsi (keçmiş Verxni Priyutski, sonralar Ketsxoveli) ev 67-də, dahi bəstəkarın
1915-1942-ci illər ərzində yaşadığı evdə muzey təşkil olundu.1985-ci ildə
qonşu həyətdəki bina da (Ş.Əzizbəyov 69) muzeyin ixtiyarına verildi.
|
|
|
Muzey 5 otaqdan, şüşəbənd, kinozal və yaradıcılıq görüşləri otağından ibarətdir.
Birinci otaq bəstəkarın iş və qonaq otağıdır. Bu otaqda qarşılaşdığımız
ilk eksponat dahi bəstəkarın Şuşada, uşaqlıq və gənclik illərini keçirdiyi
evin maketidir. Divardakı şəkillərdə balaca Üzeyirin atası Əbdülhüseyn bəylə,
sonra Qori müəllimlər seminariyasında oxuduğu illərdə tələbələr arasında,
daha sonra isə müəllimlik etdiyi orta məktəb şagirdləri arasında görürük.
1905-ci ildən Bakıda yaşayan Üzeyir bəy Bakının Bibi - Heybət qəsəbəsində
yerləşən orta məktəbdə və sonralar "Səadət"
|
|
məktəbində Ana dili,
riyaziyyat, rus dili, musiqi və başqa fənlərdən dərs demişdir.
|
|
|
Bəstəkarın barmaqları toxunan, "Bekker" alman firmasının
istehsalı olan royal - neçə-neçə əsərlərin
yaranmasının şahididir. Üzeyir bəyin müsafiri
olmuş bir çox musiqiçilər - Z.Hacıbəyov,
M.Maqomayev, Bülbül, F.Şalyapin, S.Raxmaninov, L.Rostropoviç,
R.Qlier, Ə.Jubanov, D.Şostakoviç və başqaları
şirmayı dilli royalı səsləndirərək
bu evin aurasında öz nəfəslərini yadigar
|
|
qoymuşdular.
Bu evdə nəinki musiqiçilər, eləcə də
xalqımızın tanınmış şəxsiyyətləri
M.Ə.Rəsulzadə, N.Nərimanov, C.Hacıbəyli,
C.Məmmədquluzadə, Ə.Haqverdiyev, C.Cabbarlı,
H.Cavid, Y.Çəmənzəminli, M.Ordubadi, A.Şaiq,
S. Vurğun, M. İbrahimov qonaq olmuş və dəfələrlə
söz, musiqi sənəti barədə məzmunlu məclislər
təşkil etmişdilər.
|
|
|
|
|
|
|
|